Ako ang Blog. Ang Blog ay Ako. (Para sa Adbokasiya ni PafaJex)

Submitted by taga-bundok on Friday, 26 November 201020 Comments

Matagal ng naka-imbak sa draft posts ko ang posteng ito. Sa totoo lang, yung title lang naman. Dahil wala talagang laman. Ngayon ko pa lamang isasatitik at ititipa ang mga nais kong sabihin kaugnay na rin ng Adbokasiya ni PafaJex.

Isinilang ako sa panahong tinig ko’y nagsusumiksik sa aking isipan. Mga panahong mundo ko’y umiikot lamang sa pira-pirasong papel na nagsilbing taga-pangalaga at talaan ng masalimuot kong nakaraan. Isinilang ako sa panahong ako ay mag-isa. Isinilang sa pook kung saan malayo ako sa lupang tinubuan. At ang unang uha’y kalayaang batid para sa lahat ng madaraan sa pook na akin ngayong kinalalagyan.

Tulad ng mga bagong silang, kinailangan ko rin naman ng pagkakakilanlan. Kahit na mag-isa lamang sa aking kinamulatang mundo’y nararapat lamang na ako ay may ngalan. At ang ngalang ito’y magsisilbing aking tanggulan at simbolo ng aking nilalaman Ngunit sa bawat pilas ng kalendaryo’y nagbabago rin ang hangarin kong tangan. May nais patunayan ,may nais matutunan at malaman.

Ang aking tahanan ma’y nagpabago-bago ng anyo at lugar na kinaruroonan. Maging ang aking bansag ay nag-iiba ayon sa ayos at tindig na aking nais ipabatid sa mga panauhing ligaw. Ako ay dumami at nahati sa maraming katauhan. May tahanan ding ikinubli sa karamihan. Ngunit ako ay iisa lamang, nananahan lang sa iba’t-ibang tahanan at katauhan.

Nagsimula akong mangusap sa wikang dayuhan at ngayo’y nabighani ng lubusan sa wika ng aking bayan. Mayruon na rin namang tumuligsa at nagsabing hindi ko kailangan maging matalinghaga o anu pa man. Ngunit ito ang nais kong ipangalandakan. Hindi rin naman kita hahadlangan sa paraan ng iyong pakikipagtalastasan.

Madalas akong magbago ng bihis sa ilang dahilan. Una’y upang paunlakan ang hiling ng mga kaibigan. Batid kong nais lamang nila na ako’y mapagmasdan sa kaiga-igayang postura at laman. Pangalawa’y nais ko lamang mapunan ang aking nasa at wala ng iba pang kadahilanan.

Marahil tulad ng iba, ako ay nangarap din ng kasikatan. Sabi nila’y sa dami ng puna o pintas ang basehan kung ikaw ay tunay na nabibilang. Nakamit ko na ang bilang na nais kong mapagtagumpayan. Ngunit hindi kasikatan ang aking nakamtan. Kundi ang bilang ng tunay na nakakaalam ng nilalaman ng bawat titik na aking pinapakawalan. Sapat na sa akin ang mga kaibigan, higit pa ito sa kasikatan.

Ngayon namang ang aking abang tahanan ay titulado na. Tangan nito ang tunay na ngalan ko. Kung sino ako sa tahanang ito ay hindi naman nangangahulugang ito ay kabuuan ng pagkatao ko. Ito lamang ay parte ng kung sino talaga ako. At sa mga panahong walang bagong poste ang naitatayo marahil abala o tinatamad lamang ako.

Bilang tugon sa Adbokasiya ni PapaJex sa kanyang artikulong Kulangot sa Pader ni Mr. GB na inilathala sa tahanan ni J. Kulisap sa posteng Ampiyas nuong ika-dalawampu ng Setyembre taong dalawang libo at sampu ay ang mga sagot sa iniwang katanungan sa naturang lathalain.

1. Sa pang-araw-araw na suliranin nakakatulong ba talaga sa iyo ang blogging? – Hindi. Minsan nakakadagdag pa nga ng problema ko. Isa pa hindi naman ako araw-araw na nagba-blog. Pero nakakatulong naman talaga ito hindi nga lang araw-araw.
2. Sayong sariling pananaw bakit kaya ang ilan walang sariling blog? – Maliban sa walang access sa internet, wala silang interes sa anumang may kinalaman sa blogging.
3. Ipaliwanag ang salitang “Freedom of Expression” – Kalayaang iparamdam, ipadama o ipahayag ang saluobin sa anumang paraan. Kasama na dito ang pag-mumura. Pero, hindi naman talaga ako nag-mumura.
4. Magbigay ng isang-daang dahilan kung bakit kailangan mong i-delete ang iyong blog. – Walang dahilan. Iniiwan ko lang ang mga blog ko pero may nakapaskil na karatula patungo sa bago kong blog.

PAHABOL LANG (kaunting paliwanag sa aking inilathala sa taas):

• Unang talata – Dahilan at kung saan nagsimula akong mag-blog.
• Ikalawang talata – Tungkol sa blog title/tagline at username. May kinalaman ito kung paano mo ipi-presenta ang iyong sarili sa mga mambabasa.
• Ikatlong talata – Ang papalit-palit ko ng blog platform at username. Kasama na ang mga secret blog at identity ko. XD
• Ika-apat na talata – Medium ng aking blog. Halo naman talaga yan. English at Tagalog.
• Ika-limang talata – Pabago-bagong anyo o theme ng aking blog. Sa aking pananaw, nasa personalidad rin ng author ang kanyang blog theme. Parang kung paano ka magdamit.
• Ika-anim na talata – Sabi dati sa akin kapag maraming comments yun ang basehan ng worth mo as a blogger. Iba’t-iba rin naman ang pananaw diyan. Pwede rin.
• Ika-pitong talata – Tungkol sa datkom at pagha-hiatus ko ng madalas.

Hindi ko na isinama ang madalas na pangangapit-bahay. Naniniwala naman kasi ako na kapag madalas ka makipag-tsimisan sa mga kapitbahay mo. Madalas din silang bibisita sa bahay mo. I mean, bloghopping. Sorry naman busy lang ako kaya di makadalaw. LOL.

Oo nga pala, kung bakit naalala kong may nakabinbin akong poste. Salamat kay Goyo dahil nakita ko sa kanyang Tumblr ang isang poste na may kinalaman din sa Ampiyas. Yun lang. Exit na ulit ako.

:p

20 Comments »

Mental Climax said:

Nakaaliw naman ang post mo. Kahit na hindi ka araw-araw nagba-blog, hindi mo maikakailang malaki ang bahagi nito sa buhay mo. Nakakalito nga lang ang blog mo dahil sa kakalatan.

- 27 November 2010 at 1:12 am

admin (author) said:

@Mental Climax

Malaki nga ang naitulong ng blog sa akin. Nakatulong din kasi ito para mahanap ko ang mga nawawala kong pagkatao at kahit papaano ay natutugunan ang mga pagnanasa ko. LOL. Seryoso ako.

Regarding sa ayos ng blog, may kakalatan nga. Pero hindi na masyado. Di tulad nung mga nauna ko pang theme. Parang basura lang. Pero, tulad ng nabanggit ko sa post… tulad sa blog ko, nakakalito ako dahil pakalat-kalat lang din ako. :p

Salamat sa pag-bisita. Salamat din at nabigyan mo ako ng ideya sa susunod na post ko. Yung video ng Laban O Bawi. Sana matuwa ka. Hehe.

- 27 November 2010 at 4:53 am

J. Kulisap said:

Mahusay na mahusay.

Tiyak na maligaya si Jex saan man siya naroroon ngayon.

- 27 November 2010 at 8:13 am

lio loco said:

ibang klase, parekoi. para akong nagbabasa ng tulang may sukat at tugma sa iyong lathala.

‘yung totoo? bigla kong naisip ang pitong horcrux ni voldemort habang binabasa ko ‘to. hindi kaya pito rin ang blog mo? XD

tungkol sa kasikatan, lahat naman ng blogger naghahangad niyan. ipokrito ang magsasabing hindi niya hinangad maging sikat ni minsan. parang ako lang. nung una, nagsusulat ako ng kung anu-anong shit na walang pakialam. pero may mga pagkakataong nagsusulat din pala ,ko para mapansin ng mga dumadaan.

ngunit hindi naman kelangang maging sikat para sumulat ng akdang malupet. marami na ‘kong nabasang mga blog na masarap basahin kahit kokonti ang koment. kung magkaminsan pa nga, sila talaga ‘yung masarap basahin nang paulet-ulet.

at ang dami ko namang palang sinabing kung anu-anong shit. \m/

- 27 November 2010 at 8:27 am

Mr. GB said:

Ang pinaka importante lang sakin tol naibato ko kung ano ang napulot ko mula sa inyo. Kwits lang..

Hindi ko na hangad pa ang maghabol sa kahit na anong karangalan.

Alam mo yan…

“bilang may parehong pananaw….”

- 27 November 2010 at 4:12 pm

admin (author) said:

@ LIO LOCO

Tama ka Pareng Lio.
Lumipas na ang araw na yun para sa akin, simula ng makatagpo ako ng mga kaibigan.

Haha! Seryoso ako. Nga pala, pito talaga ang blog ko. :p

- 29 November 2010 at 7:30 pm

admin (author) said:

@ J. KULISAP

Maligaya ako at ako’y nakakapagpaligaya. Sana naligayahan ka rin. LOL

- 29 November 2010 at 7:33 pm

admin (author) said:

@ Mr. GB

Tama ka ‘tol. *thumbs up

- 29 November 2010 at 7:45 pm

salbehe said:

@Parang tanga na naman akong nahilo sa bahay mo. Ayos din ang sagot mo, sana daan yan para hindi ka na mag hiatus.

- 30 November 2010 at 4:36 am

admin (author) said:

@ SALBEHE

Sa ngayon malamang di muna ako mag-hiatus. Lalo pa’t wala na akong trabaho.
Hehe… eto rin yung theme ko dati. Pinalitan ko lang yung background, yung header at yung “cardboard”. :p

- 30 November 2010 at 12:14 pm

aninipot said:

andito na naman ang comment section na para akong nagsusulat sa yellow paper..hahaha

madalas masarap paglaruan ang mga salita sa patalinghagang paraan, ewan ko, madalas kung hangaan ang mga taong gumagamit ng ganitong istilo..kaya nga minsan nagpapakatalinghaga din ako..

- 2 December 2010 at 5:01 am

admin (author) said:

Yung iba kasi kapag matanglihaga ka sa tagalog, ayaw nila. Pero kapag sa english ka naman nagpakatalinghaga, bilib na bilib sila. Ewan.

- 3 December 2010 at 5:07 am

jec mendiola said:

gusto ko ‘tong comment section mo kuya

ang totoo, nagsimula akong mag-blog para lang may ibang pagtataguan ng secrets, nalaman ko kasing binabasa ng mga tao sa bahay yung journal ko kaya iyun. tas ngayon na may pailan-ilan nang nagbabasa talaga ng blog ko, hinahangad ko na ang kasikatan.woo! haha ) asa naman ako.

Sobrang sang-ayon ako dun sa ika-limang talata. Isa din kasi ako sa papalit-palit ng theme. Sumasalamin ang itsura at ayos nito sa personalidad ng blogger

- 3 December 2010 at 6:35 am

admin (author) said:

@ JEC

Hehe… Thanks Jec.
Mahusay ka sa graphics kaya siguradong kikilalanin ka sa galing mo. Maliban dun lahat naman tayo ay may puwang sa mundo. ^^

- 6 December 2010 at 5:03 pm

geylii said:

@waaaaa! ang ganda, bat ngaun ko lang to napuntahan ?

- 7 December 2010 at 8:29 am

admin (author) said:

@ GEYLII

Hala, salamat po. Sana makasalubong kita sa ibang blog. Wala ka o kasing link na iniwan.

- 20 December 2010 at 9:28 pm

geylii said:

pambihira .. ang hiraaaap !!! haha msyadongf pang matalino . hehe

- 14 January 2011 at 6:07 pm

geylii said:

pambihira .. ang hiraaaap !!! haha msyadong pang matalino . hehe

- 14 January 2011 at 6:07 pm

Red said:

kapag ganito ang nababasa ko lalo kong nararamdamang malalim pa ang dapat kong hukayin sa blogging weeeee. Kasarap mangapitbahay kaso ung oras lagi salat.

- 16 February 2011 at 6:24 pm

doon po sa amin said:

hello!
wala bang like button dito? basta, like ko ang artwork sa itaas at ang isinasaad sa baba nito.

taga-bundok

Hello po DPSA! Merong fb like button sa baba ng post. Yung artwork, hmn… gawa ni Jex. Salamat na muli sa pagbisita at pag-iwan ng puna. Magandang gabi mula sa disyerto ng Kuwait.

- 24 June 2011 at 7:33 pm